Hier ein paar Texte aus dem reichhaltigen Fundus von ZUR WACHAUERIN (© Wolfgang Kühn):

» WIA DA ÄGYPTISCHE SUMMA (*)
» PECH GHOBT (*)
» KLISCHEE ADÉ! (*)
» WOIDVIERTLER AWAUNGAD (*)
» S' DONAUWEIBERL
» DIE SCHLAUEN DÜRNSTEINER
» DIE HUNDE VON KUENRING

(*) aus: "IN MEINA WÖD"



WIA DA ÄGYPTISCHE SUMMA

da launge
und da diare
und da glotzade
und da gfüde
und da ozwickte
und da hadschade
und da blade
und da kurze

und da gstauchde
und da damische
und da ghazde
und da scheanglade
und da waumpade
und da odrahde
und da schwindliche
und da goschade

und da haarige
und da stingade
und da hiniche
und da gsakklde
und da gstopfde
und da gfeanzde
und da gspreizde
und da klane

und da oghausde
und da eingspritzde
und da hamptige
und da blatzade
und da gsöchde
und da bochane
und da kaasige
und da grantige

und da gschamige
und da ghetzde
und da derrische
und da raunzade
und da aughaude
und da graupade
und da zottade
und da bärade

und da bordade
und da kropfade
und da schnorrade
und da launge
und da diare

… san olle buagamasta wuarn!


PECH GHOBT

eh nur drei ochtl
hot a beim heirichn trunkn
hot a gsogt,
owa daun is no ans
aufs haus gaunga,
hot a gsogt,
da leiwande wirt
hots afoch hergstölt,
hot a gsogt,
daun no a stehochtl,
des gheart afoch dazua,
hot a gsogt,
noche no a schaunkochtl,
drauf hot da wiat bestaundn,
hot a gsogt,
ois drüwastrara
no a reiseochtl,
hot a gsogt,
goa net zum redn
van treppetrunk
hot a gsogt,
owa des fluchtochtl
hät nimma sei miassn
hot a gsogt
bevors eam
en schein zwickt haum
haums gsogt


KLISCHEE ADÉ!

a
schweizer,
der
kan kas mog,
a
österreicher,
der
kan woiza kau,
a
italiener,
der
kane spaghetti ißt
und
a
deitscher,
der
an humor hot


WOIDVIERTLER AWAUNGAD

ob a
leicht
schasaugad is
oda
blunznfett,
hot
da nervige gost
aus da grossn stodt
den gnervtn köllner
vam laund
gfrogt,
wiara
eam
in sei
eiskoits kriagl
stott
an bierwarma
sei paarl fraunkfurter
eineghängt
hot


S' DONAUWEIBERL

Des Donauweiberl
hot bei mir ka Leiberl
hot scho so mauncher Fischer gsogt
und glei drauf hot's eam pockt!
Des Donauweiberl
hot eam zogn beim Leiberl
hot eam den Kopf vadraht
und aufn tiafn Grund vazaht!

Schau Bua, los 'n Kopf net hänga,
de Tog wearn wieda länga,
da Schnee wiad immer nossa
und des Eis wiad boid zu Wossa!

Vota, da Winta is vü z'laung
der mocht mi richtig kraunk.
Schau net so vahärmt,
ohne Wossa bin i neamd!

Schau Bua, so is' Lebm,
es kaun net imma Summa gebm!
Hea drauf, wos i sog,
mit da Zeit vagißt de Tog!

Vota, hea ma zua,
i hob van Winta wiarklich gnua
i muaß des Wossa wieda gspiarn
und de Donau inhalliern!

Bittschee sei ka Noa,
do draussn lauert d' Gfoa!,
hot da oide Fischer gsogt
und da junge hot eam gfrogt:

Vota, wos soi sei?
Do pfuscht uns kana drei,
de Donau is so stü',
daß i owetauchn wü'!

Bua, hea bitte auf,
es gengan so vü Fischer drauf,
i mecht di net valiern,
a waun i scho aunfaung wos zum gspiarn!

Vota, sie hot so wunderbore Hoa,
du bist eifersüchtig, is ma kloa,
loß ma Zeit bis in da Fria,
daun kumm i fruastuckn zu dia!

Des Donauweiberl
hot bei mir ka Leiberl
hot scho so mauncher Fischer gsogt
und glei drauf hot's eam pockt!
Des Donauweiberl
hot eam zogn beim Leiberl
hot eam den Kopf vadraht
und aufn tiafn Grund vazaht!


DIE SCHLAUEN DÜRNSTEINER

I dazöh eich jetzt a Gschicht,
de hob i ma net zsaumandicht:

de Gschicht is wirklich woah'
und is passiert voa a poa hundert Joah'!

Scho domois haum uns d'Piefke gwöld -
mit de Franzosn woitn s' uns auns Göd!

Se san de Donau owazogn
und i schwör 's, es is net glogn:

wir haum's mit'n Schmäh afoch vatriebm!
Jo, de san net recht laung bliebm!

Unsre Stodtmauern woarn domois scho so oid,
de war'n eh zsaumbrochn boid!

Mia woarn eigentlich valoarn,
hätt ma net a List geboarn …

Mia haums afoch vasuacht
und olle Brunnenreahrln gsuacht!

Daun hauma s' schwoaz augmoit,
daß 's va draußen neamd auffoit,

wauma s' durch de Fenster steckt,
jo, unsa Plan woa guat ausgheckt!

Mia woarn fost ohne Surg,
weu unsa Stodt woa wia a Burg!

So stoark und uneinnehmboar,
des woa scho fost a Foar!

Zeitlich in da Frua haum sa si traut,
de hot's gscheit aus de Sockn ghaut!

Überroi Kanonenroahr,
richtig echte woarn's a poar!

Es hot si aungheart wia im Kriag -
i schwör's, daß i net liag:

wia a Schlochtföld haum sa's empfunden,
unsa Kuchlgschirr woa gaunz zaschunden!

De haum glaubt, des is de Hö'
und haum umdraht auf da Stö'

und haum net gmerkt in eanan Zurn:
da Goliath is scho wieda zweita wurn!


DIE HUNDE VON KUENRING
(NUR DER EINSTÜRZENDE HIMMEL SELBST KANN MEINE BURG BEZWINGEN!)

Heinrich, du i gspia,
den Tod bis in die Knia!
Wos woarn wia fia wüde Hund,
a kurzes Lebm, owa bunt!
I waß, es woa net richtig,
owa domois woas ma wichtig,
daß i gnumma hob wos geht,
mea ois i je braucht hätt!

Heinrich, du i gspia,
den Tod bis in die Knia!
Sogoa den Bischof hob i gnumma,
denk i heit no volla Kumma!
Über Gott und Teife hob i glocht
mi über d' Kirchn lustig gmocht,
owa ois hob i valuarn,
denk i heite zruck im Zurn!

Heinrich, du i gspia,
den Tod bis in die Knia!
I hob nix mea ois mei Lebm,
des mecht i dem Bischof gebm!
I hob nimmermea vü Zeit
und Passau is no weit,
kaunst net du vielleicht fia mi
und i dafia fia di?

Heinrich, du i gspia,
den Tod bis in die Knia!
Nochher is ma gscheiter
und denkt si owa leida
is ollas scho vü zspät
weu ka Anschlusszug mea geht!
I waß, i bin z' frua draun
weu es gibt jo no ka Baun!

Heinrich, du i gspia,
a Kribbeln in die Knia!
Du, i warat gaunz guat drauf,
spia ma Aggstein wieda auf?
Loss uns d' Schiffal inspiziern
und den Rewak daun hoibiern!
Loss uns no amoi trinken heit,
auf de guade oide Zeit!

Heinrich, du i gspia,
des Sterbm bis in die Knia!
No grod vurhin hob i glocht
und aun gaunz wos aundas docht.
Owa in Wirklichkeit is aus,
Heinrich, moch da nix draus!
Dem Herrgott graust voa dia
genau so wia voa mia!